ቤተክርስቲያናችን የመንፈሳዊ ዜማ ኮንፈረንስ ላይ ተሳተፈች …

የቤተክርስቲያናችን ሰንበት ትምህርት ቤት በጎተንበርግ ከተማ በተደረገ የመንፈሳዊ ዜማ ኮንፈረንስ ላይ ከአባቶች እንዲሁም ከመመናኑ ጋር በመሆን  የደመቀ ተሳትፎ አድርጓል

በእለቱም የተለያዩ ወቅቱን የሚያወሱ ያሬዳዊ ዜማዎች የቀረቡ ሲሆን ለተገኙትም ታዳሚዎች ስለዜማዎቹ ይዘት እና ምንጭ መጠነኛ ገለጻ ተደርጓል

20160910_095029

 

አመታዊው የመስቀል ደመራ በአል በደማቅ ሁኔታ ተከበረ …

እንደቀደሙት አመታት ሁሉ የዘንድሮውም የመስቀል ደመራ ክብረ በአል በደመቀ ሁኔታ ተከብሯል

በእለቱ ከበድ ያለ ዝናብ ቢጥልም  የተገኘው በዛ ያለ ምእመን በአሉን በደማቅ ሁኔታ አክብሮት አምሽቷል

ማስታወቂያ

ባለፈው እሑድ መስከረም 22 ቀን 2009 ዓ ም (Oktober 2 – 2016) በደብረ ዘይት (ቢሾፍቱ) በሚከበረው ባህላዊ የእሬቻ በዓል ላይ ባሳዛኝና ባሰቃቂ ሁኔታ ሕይወታቸው ላጡ ኢትዮጵያውያን ወገኖቻችን ነገ እሑድ መስከረም 29 ቀን 2009 ዓ ም (Oktober 9 – 2016) Bergsjödalen 44 በሚገኘው የደብረ ኃይል ቅዱስ ገብርኤልና ቅዱስ ጊዮርጊስ ቤተ ክርስቲያን የዕለቱ ሥርዓተ ቅዳሴ ከተጠናቀቀ በኋላ ጸሎተ ምሕላና ጸሎተ ፍትሐት ይደረጋል፡፡
ስለዚህ ይህ ጥሪ የደረሳችሁ ሕዝበ ክርስቲያን በሙሉ ከላይ በተገለፀው ቦታ በሰዓቱ በመገኝት በሚካሔደው ጸሎተ ምሕላና ጸሎተ ፍትሐት ላይ ተካፋይ ትሆኑ ዘንድ ላልሰሙትም እንዲያሰሙ በእግዚአብሔር ስም ጥሪያችንን እናቀርባለል።

የጎተንበርግ ደብረ ኃይል ቅዱስ ገብርኤልና ቅዱስ ጊዮርጊስ ቤተ ክርስቲያን፡፡

የእግዚአብሔር ሰላም ከሁላችን ጋር ይሁን፡፡

መንፈሳዊ ደስታ

መንፈሳዊ ደስታ

መንፈሳዊ ደስታ ውጤቱ እጽፍ ድርብ የሆነ ዘለአለማዊ ደስታ ነው:: ሐዋርያት ጌታን ባዩ ጊዜ ደስ አላቸው እርሱም ሰላም ለእናንተ ይሁን . . እንደገና አያችኋለሁ ልባችሁም ደስ ይለዋል ደስታችሁንም የሚወስድባችሁ የለም” በማለት ማንም የማይቀማቸው ደስታ መሆኑንና ዘለዓለማዊ መሆኑን ነግሯቸዋል (ዩሐ.16 ፥ 22 ፣ ዩሐ. 20 ፥ 20)፡፡ ቅዱስ ጳውሎስም ሁል ጊዜ በጌታ ደስ ይበላችሁ ደግሜ እላለሁ ደስ ይበላችሁ” በማለት ለሰው ልጆች የሚጠቅመውን ምክር ሰጥቷል (ፊል.4፥4):: እመቤታችን ቅድስት ድንግል ማርያም ደግሞ የደስታን ታላቅነትና ዘለአለማዊነት እንዲህ ስትል ትገልጻለች ነፍሴ ጌታን ታከብረዋለች መንፈሴም በአምላኬ በመድኃኒቴ ሐሴት ታደርጋለች” (ሉቃ. 1፥ 47):: እመቤታችን ቅድስት ድንግል ማርያም ደስ የሚያሰኝ ድምፅና ምስጋና ትሰማ ነበር:: ጌታን በፀነሠች ጊዜ ቅዱሳን መላእክት ማኅፀንዋን ዓለም አድርገው ቅዱስ ቅዱስ ቅዱስ እግዚአብሔር እያሉ በማኅፀንዋ ሲያመሠግኑ ትሰማ ነበርና (አረጋዊ መንፈሳዊ ገጽ 25)

ሌላው የወንጌል አስደሳችነት በዕርቅና በንሰሐ ኃጢአትን በማስወገድ የሚገኝ ደስታ ነው:: ሰው ሁሉ ከኃጢአትና ከልዩ ልዩ መጥፎ ልማዶች በቃለ ወንጌል ነፃ ሲወጣ ፣ በንሰሐ ኃጢአትን ድል ሲነሳ፣ ይቅርታን ሲያገኝ እጅግ ደስ ይለዋል:: ይህ ደስታ የጠፋው ልጅ ወደ አባት ቤት በመመለሱ የተደሰተው ደስታ ነው (ሉቃ.15 ፥ 24)፡፡ ነቢዩ ዳዊትም ምን እንዳለ እንመልከት በሂሶጵ እርጨኝ እነፃለሁ እጠበኝ ከበረዶም ይልቅ ንፁህ እሆናለሁ ሐሴትንና ደስታን አሰማኝ የጻድቃንም አጥንቶችም ደስ ይበላቸው” (መዝ.50፥8):: ወደ እግዚአብሔር ቤት እንሂድ ባሉኝ ጊዜ ደስ አለኝ” በማለት በተደጋጋሚ ተናግሯል (መዝ. 121፥1):: ይህ ደስታ ሰው ሁሉ ከእግዚአብሔር ጋር ሲገናኝ ዘላለማዊ የሆነ ደስታ እንደሚያገኝ የሚገልጽ ነው። መጥምቁ ዩሐንስ “ሙሽራ ያለችው ሙሽራ ነው ቆሞ የሚሰማው የሙሽራው ሚዜ ግን በሙሽራው ቃል እጅግ ደስ ይለዋልየእኔ ደስታ አሁን ተፈፀመች” ብሏል (ዩሐ.3 ፥ 29)፡፡ ይህ ደስታ ከራስ ምኞት ነፃ የሆነ መንፈሳዊ ደስታ ነው። በወንጌል ትምህርት ሕዝቡን ከእግዚአብሔር ጋር አገናኝቷል። “በልቅሶ የሚዘሩ በደስታ ያጭዳሉ” (መዝ.125 ፥ 5) በእግዚአብሔር ፍቃድ የሚሠሩ ከፍሬው የተነሳ ደስተኞች ናቸው። ቅዱስ ጳዉሎስ “ኃዘንተኞች ስንሆን ዘወትር ደስ ይለናል” (2 ቆሮ. 6 ፥ 10) ካለ በኋላ “አሁን ከመከራዬ ስለ እናንተ ደስ ይለኛል” ብሎ እንደተናገረ። ከእግዚአብሔር ጋር በመሆን የሚዘራና የሚያጭድ አብረው ደስ ይላቸዋል (ዩሐ.4፥36)። ቅዱስ ወንጌል ደስ ከሚላቸው ጋር ደስ ይበላችሁ” ይላልና (ሮሜ. 12፥15)። እኛ በክርስቶስ አንድ አካል ነን። አንድ ሰው በቃለ ወንጌል ቢደሰት ሌሎችም ሰዎች ከእርሱ ጋር እና በእርሱ ይደሰታሉ። በሰዎች ደስታ መካፈል መልካም ምግባር ነውና (ሉቃ.15 ፥ 10)፡፡ የኤልሳቤጥ ዘመዶችና ጎረቤቶች ለቅድስት ኤልሳቤጥ ጌታ ምሕረቱን እንዳደረገላት ሰምተው ከኤልሳቤጥ ጋር ደስ አላቸው (ሉቃ.1 ፥ 57)፡፡ ቅዱስ ጳውሎስ በቃለ ወንጌል የተደሰቱትን ምእመናንን እንዲህ ሲል አመስግኗል “እነሆ እናንም እኛንና ጌታን መሰላችሁ በብዙ መከራ ከመንፈስ ቅዱስ ደስታ ጋር ተቀብላችኋል ለሌሎች ሰዎችም ሁሉ ምሳሌ ሆናችኋል የጌታችንን ቃል ከእናንተ ሰምተው ተምረዋልና ደግሞም በእግዚአሔር ማመናችሁ በየሀገሩ ተሰምቷል” (1 ተስ 1፥6–10)፡፡ ቅዱስ ጴጥሮስም አሁንም በጌትነቱ በተገለጠ ጊዜ ደግሞ ድስ ብሏችሁ ሐሴት እንድታደርጉ ክርስቶስን በመከራ ትመስሉት ዘንድ ደስ ይበላችሁ፤ ስለ ክርስቶስ ስም ብትነቀፉ ብፁዓን ናችሁ” በማለት የወንጌል አስደሳችነት ከመከራ ሁሉ እንደሚያወጣ አስገንዝቧል (1 ጴጥ. 4 ፥ 13፤ ሐዋ. 5 ፥ 41)፡፡ የእግዚአብሔር መንግሥት ጽድቅና ሰላም በመንፈስ ቅዱስ ከሆነ ደስታ ነው እንጂ መብልና መጠጥ አይደለምና ፤ በቃለ ወንጌል ለክርስቶስ የሚገዛ ግን እግዚአብሔርን ደስ የሚያሰኝና በሰውም ዘንድ የተመረጠ ነው፡፡

አህዛብም የእግዚአብሔርን ቃል ሰምተው ደስ አላቸው የእግዚአብሔርም ቃል በየሀገሩ ሁሉ ተዳረሰ መንፈስ ቅዱስም በደቀ መዛሙርቱ ላይ ሞላ ደስም አላቸው (ሮሜ 14 ፥17 ፣ ሐዋ. 13 ፥ 52)፡፡ ጌታም “በፍቅሬ ኑሩ ደስታዬ በእናንተ ይኖር ዘንድ ደስታችሁም ፍፁም ይሆን ዘንድ” እንዳለው ፤ ደስታችን ፍፁም መሆኑን አረጋግጠናል፡፡ ነቢዩ ዳዊት “ነፍሴ ግን በእግዚአብሔር ደስ ይላታል በማዳኑም ሐሴት ታደርጋለች” (መዝ. 33 ፥ 9)። የሰው ልጆችም በክንፎችህ ጥላ ይታመናሉ ከቤትህ ጠል ይረካሉ ከደስታህም ፈሳሽ ታጠጣቸዋለህ የሕይወት ምንጭ ከአንተ ዘንድ ነውና” (መዝ. 34 ፥ 8) የዋሆች ምድርን ይወርሳሉ በብዙም ሰላም ደስ ይላቸዋል ርስታቸውም ለዘለዓለም ነው” ብሏል (መዝ. 35 ፥ 11)። በመቀጠልም “አቤቱ የፊትህ ብርሃን በላያችን ታወቀ በልባችን ደስታን ጨመርህ ፤ ከስንዴ ፍሬና ከወይን ዘይትም ይልቅ በዛ በአንተ የሚታመኑት ሁሉ ለዘለዓለሙ ደስ ይላቸዋል” (መዝ. 4 ፥ 7 ፣ መዝ. 5 ፥ 11)፡፡ በማለት ቅዱስ መጽሐፋችን መንፈሳዊ አስደሳችነትን በተደጋጋሚ ገልጿል፡፡ መልአኩም እንዲህ አለ እነሆ ለእናንተ ለሕዝቡ ሁሉ ደስታ የሚሆን ታላቅ የምስራች እነግራችኋለሁ አትፍሩ” (ሉቃ. 2 ፥ 10)፡፡ ሕዝቡም ሁሉ ቃለ ወንጌልን ሲሰሙ ፈጽሞ ደስ እንዳላቸው ቅዱስ ማርቆስ እንዲህ ሲል ጽፎልናል ሕዝቡም ደስ ብሎአቸው ያዳምጡት ነበር” (ማር. 12 ፥ 37)። ጌታችን መድኃኒታችን ኢየሱስ ክርስቶስም የወንጌልን አስደሳችነት ምድራዊና ጊዜያዊ ብቻ አለመሆኑን ለደቀ መዛሙርቱ እንዲህ ሲል አስረድቶአቸዋል ነገር ግን አጋንንት (መናፍስት) ስለተገዙላችሁ ደስ አይበላችሁ ግን ስማችሁ በመንግሥተ ሰማያት ስለተጻፍ ደስ ይበላችሁ” (ሉቃ. 10 ፥ 20)፡፡ ሕገ ወንጌልን ጠብቀውና በታማኝነት የሚኖሩ ሁሉ ወደ ዘለዓለም ደስታ እንደሚገቡም እንዲህ ሲል አስተምሯል ጌታውም መልካም አንተ የታመንህ በጎ አገልጋይ ፤ በጥቂቱ የታመንህ ስለሆንክ በብዙ እሾምሃለሁ ፤ ወደ ጌታህ ደስታ ግባ አለው” (ማቴ. 25 ፥ 21)፡፡

ወስበሐት ለእግዚአብሔር፤ ወለወላዲቱ ድንግል፤ ወለመስቀሉ ክቡር

 

የበዓል ማስታወቂያዎች

ሐምሌ 17 ቀን 2008 ዓ. ም. (July 24 / 2016) የሚከበረውን ዓመታዊ የቅዱስ ገብርኤል በዓል ምክንያት በማድረግ በዋዜማው ቅዳሜ ሐምሌ 16 ቀን 2008 ዓ. ም. (July 23 / 2016) ከሰዓት በኋላ ጀምሮ በተጋባዥ መምህራንና ካህናት አባቶች ቤርሾዳለን 44 በሚገኘው ቤተ ክርስቲያናችን የሁለት ቀን መንፈሳዊ ጉባኤ ይደረጋል፡፡

ከዚህም በተጨማሪ በዓሉ ሌሊቱን በማኅሌት፣ ጧት በቅዳሴ፣ በዝማሬ፣ በትምህርተ ወንጌልና በሥርዓተ ንግሥ የሚከበር ሲሆን በዕለቱ ሥርዓተ ጋብቻ የሚፈጽሙትን ሙሽሮች የተመለከተ ልዩ መንፈሳዊ መርሐ ግብር የሚኖር ይሆናል፡፡

ስለዚህ ይኸንን መንፈሳዊ መልእክት የምታደምጡ ወገኖች ሁሉ ካላይ በተጠቀሰው ቀንና ሰዓት በቦታው ተገኝታችሁ የጉባኤውና የዚህ ታላቅ መንፈሳዊ በዓል በረከት ተሳታፊ ትሆኑ ዘንድ በእግዚአብሔር ስም ተጋብዛችኋል፡፡

እንዲሁም ቅዱስ ገብርኤል በሚውልበት ዕለት ማለትም ሐምሌ 19 ቀን 2008 ዓ. ም. (July 26 / 2016) ማክሰኞ ጧት ከ8፡00 ሰዓት ጀምሮ የቅዳሴ መርሐ ግብር የሚኖር መሆኑን ከወዲሁ እንገልጻለን፡፡

እግዚአብሔር ከሁላችን ጋር ይሁን፡፡

Kidame Ehud

ቤተ ክርስቲያናችን አዲስ የሰበካ ጉባኤ አባላት ምርጫ አደረገች

ዛሬ ግንቦት 7፣ 2008 ቤተ ክርስቲያናችንን በአመራር የሚያገለግሉ አዳዲስ የሰበካ ጉባኤ አባላት ምርጫ በቤተክርስትያናችን ተከናወነ፡፡

የእለቱ የቅዳሴ አገልግሎት እንደተጠናቀቀ የተጀመረው የምርጫ ሂደት በጸሎት የተከፈተ ሲሆን ከአስመራጭ ኮሚቴው አጭር የአካሄድ ገለጻ በኋላ ማህበረ ክርስትያኑ ቤተክርስትያናችንን በትጋት ያገለግላሉ ብሎ ያመነባቸውን እጩዎች መርጧል፡፡

የምርጫው ሂደት በከፊል
የምርጫው ሂደት በከፊል

በአምላክ እርዳታ በአካሄዱ እጅግ የተዋጣለት የነበረው የምርጫ ሂደት ከጥቂት ሰአታት ቆይታ በኋላ በጸሎት የተጠናቀቀ ሲሆን በአስመራጭ ኮሚቴው፣ በተመራጭ እጩዎች እንዲሁም በምእመናኑ መካከል የታየው ክርስትያናዊ ስነ ስርአት እና መከባበር ለታዘበው እጅግ አስደሳች ነበር፡፡

ምን እንጸልይ?

 በስመ አብ ወወልድ ወመንፈስ ቅዱስ አሐዱ አምላክ አሜን

ሚያዝያ 9 – 2008 (March 17, 2016) እሑድ በደብረ ኃይል ጎተንበርግ ገብርኤል ቤተ ክርስቲያን ከተሰጠው ትምህርት ውስጥ የተወሰደ፡፡

ርእስ – ምን እንጸልይ?

ውዳሴ ማርያም

  1. የዘወትር ጸሎት
  2. የዕለት ውዳሴ ማርያም
  3. አንቀጸ ብርሃን
  4. ይዌድስዋ መላእክት
  5. አባታችን ሆይ
  1. መዝሙረ ዳዊት

መዝሙረ ዳዊት ሁሉም ጸሎት ነው፡፡ የየቀኑን መዝሙር ለመጸለይ አከፋፈሉ የሚከተለውን ይመስላል፡፡

  • ሰኞ፡- መዝ. 1 – 30
  • ማክሰኞ ፡- መዝ. 31 – 60
  • ረቡዕ፡- መዝ.   61 – 80
  • ሐሙስ፡- መዝ.  81 – 110
  • ዓርብ፡- መዝ.   111 – 130
  • ቅዳሜ፡- መዝ.  131 – 150፤ መኃል. መኃ. ዘሰሎሞን
  • እሑድ፡- ጸሎተ ነቢያት

የየቀኑን ማድረስ ካልተቻለ

በየቀኑ አንድ፤ አንድ ንጉሥ (አሥር፤ አሥር መዝሙራትን) መጸለይ

 ልዩ ጸሎት  መዝ. 118(119) ፡ 1 – 176

አሥር አሥር መዝሙራትን ለማድረስ ካልተቻለ ጊዜ የሌለው ሰው ቢያንስ የሚከተሉትን መርጦ ቢጸልይ መልካም ነው::

መዝሙረ ዳዊት 6

መዝሙረ ዳዊት 12 (13)

መዝሙረ ዳዊት 19 (20)

መዝሙረ ዳዊት 22 (23)

መዝሙረ ዳዊት 24 (25)

መዝሙረ ዳዊት 26 (27)

መዝሙረ ዳዊት 37 (38)

መዝሙረ ዳዊት 50 (51)

መዝሙረ ዳዊት 69 (70)

መዝሙረ ዳዊት 85 (86)

መዝሙረ ዳዊት 90 (91)

መዝሙረ ዳዊት 120 (121)

መዝሙረ ዳዊት 135 (136)

መዝሙረ ዳዊት 140 (141)

መዝሙረ ዳዊት 144 (145)

  1. ጸሎተ ነቢያት

የእስራኤላውያን ምስጋና (ዘጸአት 15 ፤ 1 – 19)

የሙሴ ጸሎት (ዘዳግም 32 ፤ 1 – 43)

የሳሙኤል እናት የሐና ጸሎት (1 ሳሙ. ፤ 1 – 10)

የምናሴ ጸሎት (2 ዜና መዋ. 33 : 12 – 13)

የነቢዩ የኢሳይያስ ጸሎት (ኢሳ. 26 ፤ 1 – 21)

የንጉሡ የሕዝቅያስ ጸሎት (ኢሳ. 38 ፤ 10 – 20)

የነቢዩ የዳንኤል ጸሎት (ዳን. 9 ፤ 4 – 19)

የነቢዩ የዮናስ ጸሎት (ዮና. 2 ፤ 3 – 11)

ጸሎተ ሠለስቱ ደቂቅ (የጸሎት መጻሕፍት)

የሦስቱ ልጆች መዝሙር (የጸሎት መጻሕፍት)

የነቢዩ የዕንባቆም ጸሎት (ዕንባ. 3 ፤ 1 – 19)

የድንግል ማርያም ጸሎት (ሉቃ. 1 ፤ 46 – 55)

የካህኑ የዘካርያስ ጸሎት (ሉቃ. 1 ፤ 68 – 79)

የነቢዩ የስምዖን ጸሎት (ሉቃ. 2 ፤ 29 – 32)

ከነዚህ ውስጥ የምናሴ ጸሎት፣ ጸሎተ ሠለስቱ ደቂቅ፣ የሦስቱ ልጆች መዝሙር የሚሉት የጸሎት መጻሕፍት ውስጥ እንጂ መጽሐፍ ቅዱስ ውስጥ አይገኙም፡፡

  1. ውዳሴ አምላክ
  • የቀን፤ የቀን ጸሎት ያለው ሲሆን የሚከተሉት የዳዊት መዝሙራት በየቀናቱ መጨረሻ ላይ ይገኛሉ፡፡
  • መዝሙረ ዳዊት 6
  • መዝሙረ ዳዊት 24 (25)
  • መዝሙረ ዳዊት 37 (38)
  • መዝሙረ ዳዊት 50 (51)
  • መዝሙረ ዳዊት 69 (70)
  • መዝሙረ ዳዊት 85 (86)፤
  • መዝሙረ ዳዊት 120 (121)
  1.   ወንጌል ዘዮሐንስ

ወንጌለ ዮሐንስ ሃያ አንድ ምዕራፎች አሉት፡፡ በሳምንት ለመጨረስ ሦስት፤ ሦስት ምዕራፍ በሦስት ቀን ለመጨረስ ሰባት፤ ሰባት ምዕራፍ ካልተቻለም በየቀኑ አንድ፤ አንድ ምዕራፍ ብቻ ይጸለያል፡፡

6. ሌሎች ጸሎታት

  • አርጋኖን፡- የቀን፤ የቀን ጸሎት ያለው ሲሆን የእመቤታችንን ምስጋናና ልመና የያዘ ጸሎት ነው፡፡
  • ልክአ መልክእ፡- መልክአ መድኃኔ ዓለም፤ መልክአ ሥላሴ፤ መልክአ ኢየሱስ፤ መልክአ ማርያም፣ የቅዱሳን መልክእ . . .
  • በመጨረሻም አርባ አንድ ኪርያላይሶንና እግዚኦታ (ከስግደት ጋር)

 

እንደ ዓይነተኛ ምሳሌ አንድ መካከለኛ ደረጃ ላይ ያለ ምእመን የሚያደርሰው ጸሎት

  1. ጧት
    1. የዘወትር ጸሎት
    2. የዕለት ውዳሴ ማርያም
    3. ይዌድስዋ መላእክት
    4. ውዳሴ አምላክ የዕለቱን
    5. አርባ አንድ ኪርያላይሶንና እግዚኦታ (ከስግደት ጋር)
    6. አባታችን ሆይ
  2. ማታ
    1. አንቀጸ ብርሃን
    2. የዮሐንስ ወንጌል (አንድ ወይም ሥስት ምዕራፍ)
    3. መዝሙረ ዳዊት (አንድ ወይም 3 መዝሙራት)
    4. አባታችን ሆይ

አንዱ የጸሎት ዓይነት ሲያልቅ ወደሌላው ከመሸጋገር በፊት በአባታችን ሆይ ይዘጋል፡፡

እንደ ጊዜያችን ሁኔታ የጧትና የማታውን ጸሎት ስግደቱንም ጭምር ማሸጋሸግ ይቻላል፡፡

 ወስብሐት ለእግዚአብሔር ወለወላዲቱ ድንግል አሜን

ማስታወቂያ – የልደት በዓል

ዘንድሮ የጌታችንና የአምላካችን የኢየሱስ ክርስቶስ በዓለ ልደት ታኅሣሥ 28 ቀን 2008 (Jan. 7, 2016) ይከበራል፡፡

ስለሆነም ቤርሾዳለን 44 በሚገኘው የደብረ ኃይል ቅዱስ ገብርኤል ቤተ ክርስቲያን ከላይ በተገለጸው ቀን ረቡዕ ለሐሙስ ሌሊት ከምሽቱ 21፡00 ሰዓት ጀምሮ እስከ 00፡30 ድረስ ልዩ ልዩ መንፈሳዊ ፕሮግራሞች የሚካሄድ ሲሆን ጸሎተ ቅዳሴውም ከሌሊቱ አንድ ሰዓት ጀምሮ እስከ 3፡00 ሰዓት ድረስ ባለው ጊዜ ውስጥ ይከናወናል፡፡

እርስዎም 2008 ዓመታት ወደ ኋላ በሃሳብ ተመልሰው በቤተልሔም ከተማ በከብቶች ግርግም ክርስቶስ የተወለደበትን ሌሊት እያስታወሱ ለአምላክዎ ምስጋና በማቅረብ ከክርስቲያን ወገኖችዎ ጋራ በጣም ጣፋጭ የበረከት ሌሊት ለማሳለፍ በምሽት ወደ ቤተክርስቲያናችን ብቅ ይሉ ዘንድ ተጋብዘዋል፡፡

ሰላመ እግዚአብሔር አይለየን፡፡

የደብረ ኃይል ቅዱስ ገብርኤልና ቅዱስ ጊዮርጊስ ቤተ ክርስቲያን፡፡

ዓመታዊ የታኅሣሥ ገብርኤል በዓል

ዓመታዊው የታኅሣሥ ገብርኤል በዓል ታኅሥሥ 17- 2008 (December 27 – 2015) እሑድ ቀን የሚከበር ሲሆን በዓሉንም በደማቅ ሁኔታ ለማክበር በደብሩ ሰበካ ጉባኤ የተጋበዙ ሁለት አባቶች ከእንግሊዝና ከጀርመን ይመጣሉ፡፡ ስለሆነም በዕለቱ ከሚኖረው ሰፋ ያለ መርሐ ግብር በተጨማሪ የበዓሉ ዋዜማ ቅዳሜ ማታ ከ16፡00 ጀምሮ የዋዜማ ቁመትና የስብከተ ወንጌል መርሐ ግብር ይደረጋል፡፡ ስለዚህ የታላቁ መልአክ የቅዱስ ገብርኤል ወዳጆች የሆናችሁ ሁሉ በዕለቱም ሆነ በዋዜማው ቀን “Bergsjodalen 44″ በሚገኘው የቅዱስ ገብርኤል ቤተ ክርስቲያን በመገኘት ከበዓሉ በረከት ትሳተፉ ዘንድ ቤተ ክርስቲያናችን ጥሪዋን ታቀርባለች፡፡

ሰላመ እግዚአብሄር ከሁላችን ጋር ይሁን፡፡ አሜን

ጎተንበርግ